Ҡәҙерле кешебеҙ 23 февралдә 70 йәшлек күркәм юбилейын билдәләне! Ошо айҡанлы уны ҡотлап иң изге теләктәребеҙҙе еткерәбеҙ. Берҙән - бер Барыйына тоғро ҡатын, йәндәй күргән балаларына ҡәҙерле әсәй, килен - кейәүҙәренә абруйлы ҡәйнә, ҡәйнеш - ҡәйенһеңлеләренә хөрмәтле еңгә ул. Аллағыуат ауылында тыуып - үҫеп, педагогия училищеһы, институт тамамлағандан һуң Табылды мәктәбендә нисә быуын балаларға төплө белем биргән Әлмира Ғәтиәт ҡыҙы! "Башҡортостан Республикаһының атҡаҙанған уҡытыусыһы" исемен алыуы - уның күп йыллыҡ хеҙмәтенә лайыҡлы баһа. Уҡыусыларының рәхмәтен ишетеп, ата-әсәләренең ихтирамын тойоп, инде 44 йыл ошо ауылда ғүмер итә беҙҙең ҡәҙерлебеҙ.
Асыҡ йөҙлө, киң күңелле кеше ул Әлмира Ғәтиәт ҡыҙы! Өй эсе тулы гөлдәр, баҡса тултырып йәшелсә-емеш үҫтереп, ике яҡ туғандарҙы ла берҙәй тиң күреп йәшәй Вахитовтар. Уларҙың өйөндә һәр саҡ ут яна, бала - саға тауышы өҙөлмәй. Ҡасан килеп инмә, өйҙә тәмле еҫтәр аңҡый, өҫтәл тулы мул ризыҡ. Сөнки был йортта тик Әлмира Ғәтиәт ҡыҙының ғына хакимлыҡ иткән дәүләте - кухняһы тантана итә. Ул унда батшабикә лә, хеҙмәткәр ҙә! Күңел йылыһын һалып, йырлай- йырлай бешергән ризыҡтары телеңде йоторлоҡ! Һәр кемгә күстәнәсе, йылы һүҙе етә. Бына шундай ул беҙҙең яҡыныбыҙ. Бөгөнгө юбилейыңда әйтелгән йылы һүҙҙәр, ихлас теләктәр түгелмәй - сәселмәй генә барып етеп, матур тормошоңдо биҙәһен, күңелеңде яҡтыртһын ине!
Ныҡлы һаулыҡ, бәхетле оҙон ғүмер теләп, Өфө, Стәрлетамаҡ, Салауат, Стәрлебашта йәшәүсе барлыҡ туғандарың.